اولا كنغسلو الدجاجة ديالنا بالماء و الملح و الخل او الحامض و نفركوها مزيان بالملحة الغليضة باش يتحد منهاكل الشوائب و ايضا كينقصو الدهون ثم كنقطعها لاطراف كل طرف بوحدو باين يعني الى 9 اطراف و كنوجد الشرمولة التالية:
فإناء كندير الملح و 2 فصوص ثوم مهروس او مدقوق مع ملعقة صغيرة كامون و ملعقة صغيرة عطرية الدجاج و نصف ملعقة صغيرة خرقوم و 1 مكعب البنة زعفران و نصف ملعقة صغيرة سمن بلدي 15 حبة قاعقلا صاينة مع 5 حبات بسيبيسة صاينة مع ملعقة وريقات نويويرة صاينين كنضيف للكل قياس نصف كاس صغير ماء و كندق الكل باش تتجانس النكهات و تذوب فبعضها، بعدها كندير فيها قطع الدجاج و نفركها بهاد الشرمولة مزيان هي و البصلة ( لو مكنتش مزروبة راه كنخليها تتخمر و تشرب النكهات مزيان باش كتزيد تبنان اللحم ديال الدجاج و لو كنت مزروبة فكنديرها الطيب نيشان) بعد ميتشرب الدجاج الشرمولة كنستفو و نديرو يتشحر فالكوكوط مع البصلة و بعدها كنضيف عليه قياس الماء فاش يطيب و نسد عليه حتى ينضج بعد مكيطيب الدجاج كنعزل الدجاج عن المرقة و كنخليه ينشف من المرقة و كنوجد الخليط باش غنحمرو و هو : نصف ملعقة سكر فانيلا مع نصف ملعقة قرفة مع 2 معالق زبدة كنخلطهم مزيان و كندهن بيهم كل قطع الدجاج من كل الجهات و كندخلهم للفرن يتحمرو
و كنبدا فتحضير التخضيرة
هاد المرة خضرة بالبعويد طري و المشماش يابس و الڭرڭاع و اللوز محمر و مهرمش، مملن تخضرو بالانناس طري او معلب او يابس او بالتفاح او البنان او الخوخ معلب او اي شي عندكم انا مكانش عندي المعلب فقضيت بالطازج احسن
خذيت البعويد غسلتو و نقيتو مزيان و قطعتو ترونشات و حيدت ليه الزريعة و درتو فكسرونة مع بودرة عصير الاناناسc bon و مع فنجان صغير ماء و عملتو فوق عافية مهيلة باش يتعسل و يتشرب نكهة الاناناس
و زينت المشماش اليابس بعد مغسلتو و نشفتو بالڭرڭاع اما المرق للي بقى واقف و عاقد ديال الدجاج فضفت ليه مقدار كاس صغير من اللوز المحمر و المهرمش و نصف ملعقة سكر فانيلا و نصف ملعقة قرفة
و ملي تحمر لينا الدجاج خذيتالطاجين فاش غنقدم درتو يسخن و درت فيه المرق اولا ثم ستفت فيه قطع الدجاج و على كل قطعة حطيت دوارة من بعويد المعسل و عليها قطعة من المشماش المزين بالڭرڭاع و عاود رشيت على الكل الزنجلان و ممكن لوز محمر و مهرمش
للأمانة هادي وصفة منقولة من منتدى حتى هو مغربي و الف شكر للخت امنار اللي قدماتو